Umhverfis- og skipulagsnefnd Sveitarfélagsins Voga

Fyrir liggur tillaga að nýju deiliskipulagi fyrir íbúðarsvæði og verslunar- og þjónustusvæði við Hafnargötu. Upphaflega var gert ráð fyrir að samhliða deiliskipulaginu yrði unnin breyting á aðalskipulagi. Sú breyting var síðar felld út úr málsmeðferðinni þar sem viðkomandi breyting var tekin inn í heildarendurskoðun aðalskipulags sveitarfélagsins, sem nú hefur öðlast gildi. Deiliskipulagstillagan er því unnin á grundvelli gildandi aðalskipulags.

Við áframhaldandi vinnslu tillögunnar hefur komið fram ósk framkvæmdaraðila um breytingu á fyrirkomulagi bílastæða þannig að öll tilskilin bílastæði verði staðsett á yfirborði lóðar í stað þess að hluti þeirra verði í bílageymslu. Heildarfjöldi bílastæða breytist ekki. Einnig er óskað eftir því að skipta upp byggingunni í þrjár aðskildar byggingar og staðsetja bílskúra á bílastæði. Meginforsendur skipulagsins breytast ekki frá þeim forsendum sem kynntar voru í skipulagslýsingu.

Erindið var síðast á fundi Skipulagsnefndar þann 20 maí 2025 þar sem kom fram að umsagnir bárust vegna skipulagslýsingar.
Við kynningu skipulagslýsingar bárust umsagnir m.a. frá Heilbrigðiseftirliti Suðurnesja og Vegagerðinni. Í umsögn Vegagerðarinnar er lögð áhersla á samráð við hafnardeild stofnunarinnar og að við áframhaldandi vinnslu skipulags verði tekið mið af sjávarflóðahættu, viðeigandi land- og gólfhæðum og eftir atvikum fyrirhuguðum varnargörðum og öðrum hafnarmannvirkjum. Hönnuði er falið að bregðast við umsögninni og uppfæra deiliskipulagsgögn eftir því sem við á.

Jafnframt verði við áframhaldandi vinnslu tillögunnar tekið mið af umsögn Heilbrigðiseftirlits Suðurnesja varðandi samspil fyrirhugaðrar uppbyggingar og þeirrar athafnastarfsemi sem heimil er á nærliggjandi svæðum.

Fyrir liggur tillaga Landslags að breytingu á deiliskipulagi íþróttasvæðis, tjaldsvæðis og Aragerðis, dags. 30. apríl 2026, ásamt minnisblaði dags. 14. apríl 2026.

Míla hefur óskað eftir lóð fyrir fjarskiptaaðstöðu við bílastæði norðan Hafnargötu, sunnan tjaldsvæðis. Í tillögunni er afmörkuð 108 m² lóð fyrir fjarskiptaaðstöðuna, þar sem heimilt verður að reisa allt að 20 m² tækjahús og allt að 16 m hátt fjarskiptamastur.

Samhliða breytingunni eru núverandi endurvinnslugámar og veðurstöð færð inn á deiliskipulagsuppdrátt og fyrirkomulag bílastæða og göngustíga aðlagað að núverandi aðstæðum. Bílastæði meðfram Hafnargötu færist um u.þ.b. 3 m til suðurs, göngustígur sunnan bílastæðisins fellur út og bílastæðum fækkar úr 80 í 55. Jafnframt er ekki lengur gert ráð fyrir gegnumakstri um bílastæðið milli núverandi og fyrirhugaðrar aksturstengingar við Hafnargötu.

Á fundi umhverfis- og skipulagsnefndar þann 21. júlí 2026 var samþykkt að grenndarkynna tillögu Grænubyggðar ehf. að óverulegri breytingu á deiliskipulagi Grænuborgarhverfis 1. áfanga, í samræmi við 2. mgr. 43. gr. skipulagslaga nr. 123/2010.

Tillagan var grenndarkynnt frá 10.08.2026 til 07.09.2026. Engar athugasemdir bárust á kynningartíma.

Fyrir liggur fyrirspurn frá Erni Héðinssyni, f.h. Kjarnahúsa ehf., varðandi möguleika á lóðaúthlutun fyrir fjögurra íbúða fjölbýlishús á tveimur hæðum. Fyrirspyrjandi nefnir Kirkjuholtsreit sem mögulegan kost en óskar jafnframt eftir upplýsingum um aðrar lóðir innan sveitarfélagsins sem gætu hentað fyrir slíka uppbyggingu.

Með erindinu fylgir hugmynd að teikningum að fjögurra íbúða húsi. Fram kemur að teikningarnar séu settar fram til viðmiðunar og séu ekki endanleg hönnun.

Við yfirferð lóðamarka við Iðndal 7 og 11 hefur komið í ljós misræmi milli eldri lóðargagna og gildandi deiliskipulags. Á lóðarblaði frá árinu 2006 eru lóðirnar afmarkaðar þannig að landspilda er á milli þeirra og er hún ekki sýnd sem hluti hvorugrar lóðar. Í gildandi deiliskipulagi er hins vegar gert ráð fyrir breyttri lóðaskipan þar sem lóðirnar liggja saman og umrædd landspilda virðist hafa verið tekin inn í afmörkun aðliggjandi lóða. Samkvæmt fyrirliggjandi upplýsingum er spildan þó enn í eigu sveitarfélagsins og ekki liggur fyrir hvort ráðstöfun hennar og breyting á lóðarmörkum samkvæmt deiliskipulagi hafi verið tekin til umfjöllunar.

Erindið er því lagt fyrir umhverfis- og skipulagsnefnd til umfjöllunar um næstu skref.

Fyrir liggur fyrirspurn vegna fyrirhugaðrar uppbyggingar á Austurkoti 3. Óskað er eftir afstöðu umhverfis- og skipulagsnefndar til þess að reisa varanlegt gistihús með 8-10 gistieiningum til skammtímagistingar. Fyrirhuguð bygging er um 150 m², um 30 m að lengd og 5 m að breidd, og gert er ráð fyrir að gistieiningarnar verði á varanlegum undirstöðum undir einu samfelldu þaki.

Málið tengist fyrri fyrirspurn sem tekin var fyrir á fundi skipulagsnefndar þann 22. apríl 2025. Þá var óskað eftir afstöðu til uppbyggingar 1-2 gistihúsa, um 35 m² að stærð hvort, til skammtímaleigu. Í afgreiðslu nefndar kom fram að ekkert deiliskipulag væri í gildi fyrir svæðið en að mögulegt væri að gera ráð fyrir gistingu við gerð deiliskipulags.

Samkvæmt gildandi aðalskipulagi eru sett sérstök skilyrði um rekstrarleyfisskylda gististarfsemi innan íbúðarbyggðar og þar er m.a. fjallað um gististaði í flokki II, tegund c. Fyrirliggjandi erindi gerir nú ráð fyrir mun umfangsmeiri gististarfsemi en sú fyrirspurn sem áður var tekin fyrir.

Fyrir liggja áform Sveitarfélagsins um stækkun leikskólans við Suðurgötu 5 með uppsetningu færanlegra kennslustofa. Gert er ráð fyrir að húsnæðið verði nýtt tímabundið, a.m.k. þar til nýr leikskóli rís við Grænuborg, sem stefnt er að verði innan 5-7 ára.

Samkvæmt fyrirliggjandi gögnum er gert ráð fyrir þremur leikskóladeildum auk aukinnar starfsmannaaðstöðu. Áætlað húsnæði er um 351 m² með möguleika á allt að 189 m² stækkun til suðurs síðar. Framkvæmdin er innan skilgreinds byggingarreits samkvæmt lóðarblaði og er svæðið skilgreint til samfélagsnota í aðalskipulagi sveitarfélagsins. Á lóðarblaði er jafnframt sýndur byggingarreitur, áætlað fótspor byggingar og möguleg framtíðarstækkun.

Málið var áður tekið fyrir á fundi Umhverfis- og skipulagsnefndar í júlí 2026 þar sem fjallað var um átak um fegrun bæjarins, íbúakönnun og umhverfisverðlaun. Málið er nú lagt fyrir að nýju með nánari útfærslu á fyrirkomulagi og næstu skrefum verkefnisins.

Lagt er til að farið verði yfir græn svæði og leiksvæði í þéttbýli Voga með það að markmiði að meta ástand þeirra, nýtingu og möguleika til úrbóta. Með yfirferðinni verði sérstaklega horft til aðgengis, öryggis, búnaðar, gróðurs og almennrar ásýndar svæðanna.

Fjallað er um umgengni og frágang svæðis í Grænuborg. Borið hefur á slæmri umgengni á svæðinu og þörf er talin á að fara yfir núverandi ástand og meta hvaða úrbóta sé þörf.

Til umræðu er umferðaröryggi í Sveitarfélaginu Vogum og mögulegar aðgerðir til úrbóta. Farið hefur verið yfir ýmis verkefni sem komið geta til greina, meðal annars bætta aðkomu að Stóru-Vogaskóla, umferðargreiningar, endurskoðun gatnamóta Hafnargötu og Vogaafleggjara, lýsingu við gönguleiðir og endurnýjun umferðaröryggisáætlunar sveitarfélagsins.

Fyrir liggur erindi frá HS Veitum þar sem óskað er eftir úthlutun lóðar fyrir tengihús vegna uppsetningar UV-lýsingarbúnaðar fyrir neysluvatnsdreifikerfi í Vogum. Um er að ræða tengihús, 5,30 x 2,90 m að grunnfleti, sem hýsa mun búnað vegna lýsingar neysluvatns. Jafnframt er óskað eftir heimild til að hefja undirbúningsframkvæmdir, m.a. jarðvinnu og lagningu nauðsynlegra veitukerfa, áður en endanlegri afgreiðslu lóðar- og leyfismála er lokið. Fyrir liggur afstöðumynd með tillögu að staðsetningu mannvirkisins.