Bæjarstjóri Sveitarfélagsins Voga

Björg Ásta Þórðardóttir, bæjarstjóri Sveitarfélagsins Voga

Björg Ásta Þórðardóttir tók við starfi bæjarstjóra Sveitarfélagsins Voga í júní 2026.

Björg vill eiga gott samtal við íbúa sveitarfélagsins. Íbúar eru hvattir til að hafa samband, koma á framfæri ábendingum eða bóka tíma í viðtal við bæjarstjóra.

[Hafa samband við bæjarstjóra]
[Bóka tíma með bæjarstjóra]

Björg er lögfræðingur að mennt frá Háskóla Íslands og hlaut málflutningsréttindi fyrir héraðsdómi árið 2015. Hún hefur víðtæka reynslu af stjórnsýslu, lögfræði, stefnumótun, hagsmunagæslu og opinberri stjórnun.

Áður en Björg tók við starfi bæjarstjóra starfaði hún sem framkvæmdastjóri Sjálfstæðisflokksins. Þar áður var hún aðstoðarmaður dómsmálaráðherra og yfirlögfræðingur Samtaka iðnaðarins. Í þeim störfum kom hún að fjölbreyttum verkefnum á sviði löggjafar, stjórnsýslu, vinnumarkaðsmála, stefnumótunar og samskipta við stjórnvöld, atvinnulíf og almenning.

Björg hefur einnig sinnt fjölbreyttum trúnaðar- og sjálfboðastörfum, meðal annars fyrir sjúklingasamtök, íþróttahreyfinguna og félagsstarf í heimabyggð. Hún sat í stjórn MS-félags Íslands í níu ár, þar af sem formaður í fjögur ár.

Sem bæjarstjóri er Björg æðsti starfsmaður sveitarfélagsins og ber ábyrgð á daglegri stjórnun þess. Hún undirbýr fundi bæjarstjórnar og bæjarráðs, annast framkvæmd ákvarðana sveitarstjórnar og hefur umsjón með rekstri og starfsemi sveitarfélagsins.

Björg býr í Vogum ásamt eiginkonu sinni, Ósk Laufey Breiðfjörð Pétursdóttur, og fjölskyldu þeirra.