Bæjarstjórn Sveitarfélagsins Voga

Lögð fram kosningarskýrsla yfirkjörstjórnar Sveitarfélagsins Voga um niðurstöður sveitarstjórnarkosninga sem fram fóru 16. maí 2026.

Á kjörskrá voru 1475. Greidd atkvæði alls voru 875 eða 59,3%. Auðir seðlar voru 18 og ógildir seðlar 4.



Atkvæðin féllu þannig:

A-listi Fyrir samfélagið

223 atkvæði og 2 bæjarfulltrúa

D-listi Sjálfstæðisflokks og óháðra 333 atkvæði og 3 bæjarfulltrúa

E-listi Framboðsfélag E-listans

172 atkvæði og 1 bæjarfulltrúa

L-listi Framfarafélag L-listans

125 atkvæði og 1 bæjarfulltrúa



Réttkjörnir bæjarfulltrúar Sveitarfélagsins Voga eru:

Björg Ásta Þórðardóttir D-lista

Gunnar Júlíus Helgason A-lista

Birgir Örn Ólafsson E-lista

Guðmann Rúnar Lúðvíksson D-lista

Kristinn Björgvinsson L-lista

Áslaug Fjóla Magnúsdóttir A-lista

Hulda Blöndal D-lista



Réttkjörnir varabæjarfulltrúar Sveitarfélagsins Voga eru:

Kristín Arna Hjaltadóttir D-lista

Hilmar Ólafsson A-lista

Eva Björk Jónsdóttir E-lista

Andri Rúnar Sigurðsson D-lista

Eðvarð Atli Bjarnason L-lista

Guðrún Ósk Barðadóttir A-lista

Magnús G. Jónsson Núpan D-lista

Í samræmi við ákvæði 7. gr. samþykktar um stjórn Sveitarfélagsins Voga skal kjósa forseta til eins árs á fyrsta fundi nýkjörinnar bæjarstjórnar. Tilnefning til embættis forseta er eftirfarandi:



Tillaga D, E og L lista er að Kristinn Björgvinsson verði forseti bæjarstjórnar til eins árs.

Í samræmi við ákvæði 7.gr. samþykktar um stjórn Sveitarfélagsins Voga skal kjósa tvo varaforseta til eins árs á fyrsta fundi nýkjörinnar bæjarstjórnar. Tilnefning til embættis 1. varaforseta og 2. varaforseta eru eftirfarandi:

Bæjarfulltrúar D lista, Sjálfstæðisflokks og óháðra, E-lista Strandar og Voga og L lista Lista fólksins hafa komist að samkomulagi um samstarf kjörtímabilið 2026-2030. Samstarfið byggir á breiðum og sterkum grunni sem lagður var á liðnu kjörtímabili. Meirihlutinn mun horfa fram á veginn með áherslu á traustan rekstur, öfluga þjónustu, skýra forgangsröðun og áframhaldandi uppbyggingu sveitarfélagsins í góðu samtali við íbúa.



Lögð verður áhersla á gott samstarf allra kjörinna fulltrúa, nefndarmanna, starfsfólks sveitarfélagsins, íbúa, félagasamtaka og atvinnulífs. Jafnframt verður lögð áhersla á aukið gagnsæi, betri upplýsingagjöf og vandað vinnulag í stórum málum sem varða framtíð sveitarfélagsins.



Í fjármálum og stjórnsýslu verður lögð áhersla á traustan og hallalausan rekstur, ábyrga fjármálastjórn, hóflegar álögur og skýra forgangsröðun verkefna. Unnið verður að bættri þjónustu við íbúa og fyrirtæki, meðal annars með þjónustuviðmiðum, aukinni rafrænni þjónustu, innleiðingu Vogaappsins og nýrri heimasíðu og skýrari upplýsingagjöf. Jafnframt verður unnið að hagkvæmni í rekstri, faglegri uppbyggingu stjórnsýslu og skýrri viðhaldsáætlun fyrir mannvirki og innviði sveitarfélagsins.



Í skipulags- og innviðamálum verður lögð áhersla á sjálfbæra íbúðauppbyggingu í takt við innviði og þjónustu. Unnið verður að úthlutun sérbýlislóða, fjölbreyttari húsnæðiskostum fyrir eldri borgara og fatlað fólk, vönduðum skipulagsskilmálum og opnu samtali um framtíðarskipulag Breiðagerðis. Þá verður áfram unnið að því að styrkja áfallaþol sveitarfélagsins, meðal annars með áherslu á varaleiðir, vatnsöryggi, varavatnsból og mikilvæga grunninnviði.



Í atvinnumálum og þjónustu í heimabyggð verður lögð áhersla á að fjölga tækifærum fyrir íbúa og fyrirtæki, efla þjónustu og skapa betri skilyrði fyrir atvinnuuppbyggingu og fjölbreyttari störf. Unnið verður að heildarskipulagi hafnarsvæðisins með hliðsjón af strandlengju, aðgengi að fjöru, útivist, þjónustu, mögulegri atvinnuuppbyggingu, framtíðarnýtingu hafnarinnar og viðhaldi hafnarmannvirkja. Þá verður áfram unnið að undirbúningi uppbyggingar á Keilisnesi, atvinnulóðum, fjarvinnusetri og stofnun atvinnu- og nýsköpunarnefndar.



Í skóla-, leikskóla- og fjölskyldumálum verður lögð áhersla á að útfæra nánar og innleiða Vogamódelið sem heildstæða nálgun í leikskólamálum. Markmiðið er að bæta þjónustu við barnafjölskyldur, efla gæði leikskólastarfs, auka sveigjanleika foreldra og vinna að sjálfbærri uppbyggingu leikskólaþjónustu. Í útfærslunni verði meðal annars stefnt að gjaldfrjálsum 30 klst. í leikskóla, með hliðsjón af mönnun, húsnæði, fjárhagslegu svigrúmi og gæðum þjónustunnar. Þá verður unnið að fjölgun leikskólaplássa, bættri aðstöðu barna og starfsfólks og undirbúningi nýs leikskóla með ungbarnadeild. Áfram verður unnið að uppbyggingu Stóru-Vogaskóla, eflingu faglegs skólastarfs, ÍSAT-kennslu, skólaþjónustu, samfellu milli skólastiga og stuðningi við líðan, félagslíf og virkni barna og ungmenna.



Í íþrótta-, tómstunda-, menningar- og lýðheilsumálum verður lögð áhersla á öflugt samstarf við félagasamtök og skýrari ramma um samstarfssamninga, styrki og stuðning. Lokið verður við gerð íþrótta- og tómstundastefnu, samstarf skóla, frístundastarfs og íþróttafélaga verður eflt og unnið verður að bættu aðgengi barna og ungmenna að íþróttum og tómstundum, meðal annars með frístundarútu og samgöngustyrk. Þá verður lögð áhersla á félags- og viðburðastarf ungmenna, aukna virkni eldri borgara, betri aðstöðu fyrir líkamsrækt og heilsueflingu, eflt menningar- og viðburðalíf og stofnun Voganeistans til að styðja við frumkvæði íbúa.



Í velferðarmálum verður lögð áhersla á þjónustu, félagsstarf og upplýsingagjöf til eldri borgara, bætt aðgengi eldri borgara og fatlaðs fólks að þjónustu og eftirfylgni með samstarfssamningi við Suðurnesjabæ um velferðarþjónustu. Setja skal á fót notendaráð um málefni fatlaðs fólks, efla farsæld barna og leita leiða til að styðja við aukna atvinnuþátttöku fólks með skerta starfsgetu.



Í umhverfis-, ásýndar- og útivistarmálum verður lögð áhersla á fallegt, snyrtilegt og aðgengilegt nærumhverfi sem styður við útiveru, lýðheilsu og lífsgæði íbúa. Unnið verður að aðgerðaráætlun um fegrun bæjarins með aðkomu íbúa, bættri umhirðu, fleiri grænum svæðum, betri leiksvæðum, fjölgun áningarstaða, betra aðgengi að útivistarsvæðum og sýnilegri sögu sveitarfélagsins í nærumhverfi og á vef sveitarfélagsins.



D-, E- og L-listi ganga til samstarfsins með það að leiðarljósi að vinna saman af ábyrgð, krafti og góðu samtali fyrir íbúa Sveitarfélagsins Voga.

Kosningar í nefndir og ráð samkvæmt ákvæðum 34., 35., 43., 46. og 47.gr. samþykktar um stjórn Sveitarfélagsins Voga.