Náttúruvá - allar fréttir hér. Natural disaters - all news here. klęska żywiołowa - wszystkie wiadomości tutaj

Hér verða framvegis settar inn fréttir sem tengjast þeim jarðhræringum sem nú ganga yfir.

15. apríl 2021

Um kl. 15 í dag stendur vindur beint af gosstöðvunum yfir þéttbýlið í Vogum. Samkvæmt Gasmengunarspá er því spáð að vindátt muni haldast þannig að gasmengunin verði yfir sveitarfélaginu en verði komin meira til norðausturs í fyrramálið. Íbúar eru hvattir til að fylgja leiðbeiningum sem hægt er að sjá t.d. hér á síðunni.

 

12. apríl 2021

Samkvæmt gasmengunarspá á vef Veðurstofunnar er spáð norðaustlægri átt seinniartinn í dag og þá er mögulegt að gasmengun muni eitthvað aukast í Vogum. Samkvæmt spánni ætti það þó að vera í lágmarki  en gott er að vera á varðbergi. Gert er ráð fyrir að vindur snúi sér meira til norðurs þegar líður á nóttina og þá gæti mengun færst inn á strönd og legið þar á morgun.

 

8. apríl 2021

Spáð er norðlægri vindátt næsta sólarhringinn sem er góð átt fyrir Sveitarfélagið Voga en við ítrekum samt að mikilvægt er að fylgjast reglulega með spám og kynna sér þær leiðbeiningar sem í boði eru um hvernig á að verjast gosmengun ef til hennar kemur.

 

7. apríl 2021

Eins og flestir væntanlega vita þá hefur nú opnast ný gossprunga og því ekki ólíklegt að gasmengun muni aukast. Af því tilefni er vert að benda fólki á að kynna sér leiðbeiningabækling um áhrif loftmengunar á heilsu manna.

Þá er einnig mikilvægt að fylgjast með gasmengunarspá á vef Veðurstofunnar. Hægt er að fylgjast með spánni fram í tímann með því að draga til stikuna neðst á síðunni.

 

5. apríl 2021

Að kvöldi annars í páskum mældist aukin loftmengun yfir Vogum. Veðurstofan ráðleggur íbúum að loka húsum sínum og kynda, spár Veðurstofu eru á þann veg að það eigi að lægja  þegar líður á kvöldið og nóttina. Sú mengun sem nú mælist (um kl. 21) er óholl fyrir viðkvæma. Ný gasspá er væntanleg kl. 22.30

Á þessari síðu er hægt að skoða spá veðurstofunnar fyrir loftmengun yfir sveitarfélaginu

Á þessari síðu Umhverfisstofnunar eru góðar ráðleggingar vegna gosmengunar

 

15. mars 2021

Rýmingaráætlun sveitarfélagsins er nú tilbúin á vefnum, þ.e. leiðbeiningar ásamt rýmingarkortum. Fram kemur einnig hvaða hverfi eru í forgangi komi til rýmingar.

Samkvæmt upplýsingum Veðurstofunnar staðfesta nýjustu gerfihnattarmyndir að kvika heldur áfram að streyma inn í kvikuganginn. Mesta virknin er enn í suðurhluta ganging, í og í námunda við Nátthaga og Borgarfjall, sem og við Fagradalsfjall. Enn er talin hætta á að kvika brjótist upp á yfirborðið, og þá á svæðinu við Nátthaga. Vísindaráð almannavarna fundar á morgun, og munu í kjölfarið gefa út fréttatilkynningu.

Ekki hefur verið mikið um stóra skjálfta það sem af er degi (þetta er skrifað um kl. 17). Full ástæða er til að fylgjast áfram vel með, og komi til einhverrar aðsteðjandi hættu er mikilvægt að fylgja leiðbeiningum Almannavarna og viðbragðsaðila. 

 

12. mars 2021

Veðurstofan skrifar á heimasíðu sína kl. 12:02: Frá miðnæti í dag 12. mars hafa mælst um 1400 jarðskjálftar með SIL sjálfvirku mælakerfi Veðurstofu Íslands. Þar af mældust 19 skjálftar yfir 3,0 að stærð, sá stærsti var skjálfti 5,0 að stærð kl. 07:43, 2,7 km SSV af Fagradalsfjalli. Skjálftinn fannst vel á Suðvesturhorninu. Virknin var bundin við sunnanvert Fagradalsfjall. Í gær 11. mars mældust um 2600 jarðskjálftar sjálfvirkt. Stærtsti skjálftinn mældist að stærð 4,6 kl. 08:53, alls mældust 29 skjálftar yfir 3 að stærð. Virknin var mest í sunnanverðu Fagradalsfjalli en 4 skjálftar yfir 3,0 að stærð mældust í Eldvörpum".

Á upplýsingafundi Almannavarna í morgun kom fram að svo virðist sem kvikugangurinn leiti ekki lengur til suð-vesturs. Líklegasti uppkomustaður kviku er því enn við sunnanvert Fagradalsfjall. 

Rýmingaráætlun sveitarfélagsins er nú tilbúin, þ.e. skipulag rýmingar og rýmingarkort fyrir allt sveitarfélagið. Kortin verða sett inn á heimasíðuna síðar í dag. Einnig verður settur hlekkur á vefmyndavél á þaki íþróttamiðstöðvarinnar, enn eru þó einhverjir tæknilegir hnökrar á að sú tenging komist í fulla virkni. Fylgist með á heimasíðunni. 

11.mars 2021

Sérfræðingar á fræðslusviði Reykjanesbæjar hafa tekið saman gott fræðsluefni fyrir foreldra undir yfirskriftinni Að takast á við óvissutíma. Við höfum fengið góðfúslegt leyfi til að benda á það efni og hvetjum alla foreldra til að skoða það, þar er að finna mörg hjálpleg ráð.

Tímabil sem einkennist af óvissu getur haft umtalsverð áhrif á daglegt líf okkar. Sum börn og ungmenni eiga tiltölulega auðvelt með að takast á við óvissu og þá umræðu og breytingar sem henni geta fylgt, á meðan þetta reynist öðrum börnum og fjölskyldum erfiðara. Það er eðlilegt að finna fyrir ótta eða kvíða í tengslum við jarðhræringar. Það má segja að það séu eðlilegar tilfinningar við óeðlilegu ástandi. Börn og ungmenni leita í öryggi hjá foreldrum sínum eða öðrum fullorðnum sem þau treysta þegar þau takast á við óvissu. Mikilvægt er að ræða við börnin um það sem er að gerast hverju sinni. Ef börn eru áhyggjufull er mikilvægt að foreldrar gefi sér tíma til að hlusta á hvaða áhyggjur börnin hafa, viðurkenni líðan þeirra, upplýsi þau og leiti hjálplegra leiða í sameiningu.

Jarðskjálftavirknin færist stöðugt fjær Vogum, kvikugangurinn stækkar áfram til suð-vesturs. Jarðskjálftavirkni verður nú einnig vart í og við Eldvörp, vestan Grindavíkur. Talið er að um spennulosun sé að ræða, en ekki kvikusöfnun á þeim slóðum. Nú er líklegasti uppkomustaður kviku álitinn vera við Nátthaga, þá mun hraun einkum renna til suðurs og jafnvel ná út í sjó. 

Áfram er unnið að lokafrágangi viðbragðsáætlunar og tengingu vefmyndavélar á þaki íþróttamiðstöðvar.

10. mars 2021

Stöðufundi dagsins hjá Almannavörnum er lokið. Á fundum þessum er farið yfir stöðu mála og þróun með áherslu á viðburði síðasta sólarhrings. Alls mældust tæplega 2.900 skjálftar síðasta sólarhring. Nokkrir kröftugir sjálftar voru s.l. nótt, sem og í morgun. Kl. 08:50 mældist skjálfti af stærðinni M 4,6, í Fagradalsfjalli. Mesta jarðskjálftavirknin er nú syðst í kvikuganginum sem myndast hefur milli Keilis og Fagradalsfjalls. Áfram sést það sem kallað hefur verið "örvuð virkni", sem er alfarið bundin við ganginn áðurnefnda. Aflögun á yfirborði jarðar er greinanleg á því svæði þar sem gangurinn er að myndast, og af þeim sökum er hugsanlegt uppkomusvæði kviku enn bundið við það svæði. Jarðvísindamenn telja enn talsverðar líkur á að eldgos á þessum slóðum geti hafist innan skamms. Þá er einnig gert ráð fyrir þeim möguleika að snarpir skjálftar gætu orðið á svæðinu við Brennisteinsfjöll. Á fundinum var farið yfir nýjustu gervihnattamyndir sem borist hafa, og staðfesta þær í megin dráttum að virknin og aflögunin sé mest bundin við það svæði sem tengist kvikuganginum. Ekki er útilokað að þegar gos hefjist verði það án nokkurs fyrirvara og án mikilla jarðhræringa, þannig að einungis verði unnt að greina það með aðstoð vefmyndavéla. Veðurspá dagsins er óhagstæð hvað það varðar, spáð éljagangi og slæmu skyggni.  Frá upphafi jarðhræringanna þann 24. febrúar s.l. hafa mælst tæplega 34 þúsund skjálftar á svæðinu. 

Rýmingaráætlun sveitarfélagsins er á lokametrunum, síðar í dag eða á morgun verður sjálft rýmingarkortið fyrir sveitarfélagið birt á vefsíðu okkar. Kortið fyrir Voga er tilbúið, verið er að ganga frá kortinu fyrir Vatnsleysuströnd og Hvassahraun.

Vefmyndavélin á þaki íþróttamiðstöðvarinnar er nú tengd, en beðið er eftir tæknilegri útfærslu á að tengja hana við hlekk á heimasíðu sveitarfélagsins. Við gerum ráð fyrir að þeirri vinnu ljúki fyrir lok dagsins, og að þá verði unnt að skoða útsendingu úr vefmyndavélinni í rauntíma á heimasíðu sveitarfélagsins.

Enn skal ítrekað að engin bráð hætta steðjar að byggð, hvorki í Vogum né á Vatnsleysuströnd eða í Hvassahrauni. Hraunflæðisspár gera nú ráð fyrir að hraun renni til suðurs, einu innviðirnir sem eru í hætti miðað við þá sviðsmynd er Suðurstrandarvegur, austan Grindvíkur. Nú ríkja norðlægar áttir, sem þýðir að komi til gasmengunar blæs það til suðurs og út á sjó, eins og staðan er nú. 

9. mars 2021

Um 2600 skjálftar mældust í gær, mánudaginn 8. mars. Óróapúls mældist snemma í morgun við suðurenda kvikugangs, en gekk síðan niður nýju. Við tók að nýju „eðlileg“ skjálftavirkni á svæðinu. Talið er að óróakviðan sé til marks um hæga framrás og hægfara stækkun kvikugangsins til suðvesturs. Kvikugangurinn er nú talinn vera um 6 km langur. Talsverð skjálftavirkni er við báða enda gangsins, sem er túlkað sem spennubreytingar (einnig rætt um s.k. „gikk skjálfta“).

Kvikan er talin vera komin nær yfirborðinu en áður, talið er að hún sé nú á u.þ.b. 1 km dýpi. Búið er að útbúa nýtt hraunflæðilíkan miðað við þessar niðurstöður, sem staðfestir enn sem fyrr að áætlað hraunflæði ógni ekki byggð.

Samkvæmt s.k. aflögunargögnum heldur þensla jarðskorpunnar áfram, þó með minni hraða en áður. Þær niðurstöður er m.a. byggðar á fjölda mælitækja sem nú hefur verið komið fyrir á svæðinu. Svo virðist því sem að dragi nú úr kvikuinnflæðinu. Á hinn bóginn eru takmörk fyrir því hvað jarðskorpan þolir, þannig að meðan hún þenst áfram út er hætta á eldsumbrotum enn til staðar. Ekki er ólíklegt að ástandið verði áfram á þessum nótum næstu daga.

Gera má ráð fyrir að vefmyndavél á þaki íþróttamiðstöðvarinnar verði tengd síðdegis í dag, eða í síðasta lagi á morgun.

Vinna við rýmingaráætlun gengur vel og er á lokametrunum. Unnið er að samhæfingu gagnanna og frágangi þeirra í eitt heildarskjal. Við munum fljótlega birta innri áætlanir stofnana sveitarfélagsins á heimasíðunni. Tafla rýmingaráætlunar sem birtist á vefnum fyrir helgi er nú einnig aðgengileg á ensku og pólsku.

8. mars 2021

Fréttatilkynning að afloknum fundi Vísindaráðs almannavarna fyrr í dag:

Vísindaráð almannavarna fundaði á fjarfundi í dag til að ræða jarðskjálftahrinuna á Reykjanesskaga. Fundinn sátu sérfræðingar frá Veðurstofu Íslands, Háskóla Íslands, ÍSOR, Umhverfisstofnun, Náttúrufræðistofnun Íslands, auk fulltrúa frá Orkuveitu Reykjavíkur, Embætti landlæknis, Isavia-ANS og HS-Orku.

Á fundinum var farið yfir virkni helgarinnar, ásamt því að rýna mælingar og gögn sem hafa borist síðasta sólarhringinn.

Helstu niðurstöður fundarins

  • Áfram er talið að ef til goss kemur yrði það á sprungu einhversstaðar á því svæði sem afmarkast af Fagradalsfjalli og Keili þar sem kvikugangurinn er að myndast. Engar vísbendingar eru um kvikuhreyfingar fyrir utan þetta svæði.
  • Líklegasti uppkomustaður kviku, miðað við virkni undanfarna daga, er syðst í kvikuganginum.
  • Nýjustu gervihnattamyndir, GPS mælingar og líkanreikningar benda til þess að dregið hafi úr kvikuflæði frá því í upphafi síðustu viku. Kvikan situr grunnt og áfram þarf að gera ráð fyrir að gos geti brotist út.
  • Ef kvikugangurinn heldur áfram að stækka næstu daga og vikur, má eiga von á sambærilegum jarðskjálftahviðum og urðu um helgina.

Á fundi vísindaráðs í dag var farið yfir nýjar gervihnattamyndir sem bárust í gær og þær bornar saman við GPS mælingar, skjálftagögn og aðrar mælingar. Jarðskjálftavirkni hefur heldur minnkað frá því sem var um helgina. Á laugardagskvöld jókst jarðskjálftavirkni í Fagradalsfjalli umtalsvert og stóð sú aukna virkni yfir frá um kl 18 - 23. Rétt eftir miðnætti, aðfaranótt sunnudags, hófst órói sem stóð yfir í um 20 mínútur og skömmu seinna mældist skjálfti af stærð 3,8. Í framhaldi af því jókst virkni enn frekar og margir kröftugir skjálftar mældust. Sá stærsti mældist kl. 02:02 og var 5,1 að stærð.

Áfram er talið að ef til goss kemur yrði það á sprungu einhversstaðar á því svæði sem afmarkast af Fagradalsfjalli og Keili þar sem kvikugangurinn er að myndast. Engar vísbendingar eru um kvikuhreyfingar fyrir utan þetta svæði. Líklegasti uppkomustaður kviku, miðað við virkni undanfarna daga, er syðst í kvikuganginum. Nýjustu gervihnattamyndir, GPS mælingar og líkanreikningar benda til þess að dregið hafi úr kvikuflæði frá því í upphafi síðustu viku. Kvikan situr grunnt, nær líklega á um 1km dýpi og áfram þarf að gera ráð fyrir að gos geti brotist út.


Áhrif kvikugangsins á önnur svæði á Reykjanesskaga

Þegar kvika flæðir inn í jarðlög og myndar kvikugang, líkt og nú á sér stað á svæðinu milli Keilis og Fagradalsfjalls, myndast þrýstingur í jarðskorpunni. Það veldur spennubreytingum á stóru svæði umhverfis ganginn. Líkanreikningar sýna að þessar spennubreytingar koma af stað svokölluðum „gikkskjálftum“ við sinn hvorn enda kvikugangsins. Þessir skjálftar eru merki um spennulosun, en tákna ekki að kvika sé á hreyfingu á þeim svæðum sem þeir mælast.

Það er mat vísindaráðs að búast megi við því að virknin á Reykjanesskaga verði kaflaskipt næstu daga. Gera þarf ráð fyrir því að ef kvikugangurinn heldur áfram að myndast næstu daga og vikur þá er von á sambærilegum jarðskjálftahviðum og urðu um helgina.

Á þessari mynd er afmarkað svæði þar sem kvikugangurinn er að myndast undir jarðskorpunni. Þegar kvika flæðir inn í jarðlög og myndar kvikugang, líkt og nú á sér stað á umbrotasvæðinu milli Keilis og Fagradalsfjall, myndast þrýstingu í jarðskorpunni. Það skapar spennu austan og vestan megin við umbrotasvæðið og er líkleg skýring á þeim skjálftum sem verða þar sú að um sé að ræða svokallaða „gikkskjálfta“ sem eru merki um spennulosun en tákna ekki að kvika sé á hreyfingu á þeim svæðum sem þeir mælast. Dæmi um slíka skjálfta mátti sjá aðfaranótt sunnudags, 7. mars, þegar margir kröftugir skjálftar mældust á skömmum tíma.

Áfram eru þessar sviðsmyndir líklegastar:

  • Það dregur úr jarðskjálftavirkni næstu daga eða vikur.
  • Hrinan mun færast í aukana með stærri skjálftum, allt að 6 að stærð í nágrenni við Fagradalsfjall
  • Skjálfti af stærða allt að 6.5 verður sem á sér upptök í Brennisteinsfjöllum
  • Kvikuinnskot haldi áfram í nágrenni við Fagradalsfjall:
    • Kvikuinnskotsvirkni minnkar og kvika storknar
    • Leiðir til flæðigoss með hraunflæði sem mun líklega ekki ógna byggð

8. mars 2021

Mikil skjálftavirkni var um helgina, sem náði hámarki aðfararnótt sunnudagsins 7. mars. Einkum voru það nágrannar okkar í Grindavík sem fundu fyrir miklum, mörgum og hörðum skjálftum, sem einnig fundust vel hér norðan megin skagans. Daglegum fundi Almannavarna er nýlokið. Sérfræðingar Veðurstofunnar fóru yfir stöðuna og lögðu mat á hana. Staðfest er að talsvert hefur dregið úr skjálftavirkninni, þótt hrinan standi enn yfir. Áfram er gengið út frá því að kvikan safnist að mestu í kvikuganginn sem myndast hefur milli Keilis og Fagradalsfjalls, talið er að gangurinn hafi lengst lítillega til suð-vesturs sem skýrir hina miklu skjálftavirkni sem var um helgina. Vísindaráð Almannavarna mun kom til fundar síðar í dag, í kjölfar þess fundar má gera ráð fyrir fréttatilkynningu um stöðumat, væntanlega mun ítarefni einnig fylgja sem gerir okkur kleift að átta okkur betur á þróun mála. Samkvæmt hraunflæðilíkani Veðurstofunnar er enn gert ráð fyrir tiltölulega litlu og afmörkuðu hraunflæði komi til þess að kvika leiti upp á yfirborðið, og ekki talin hætta á að hraun ógni byggð.

Vefmyndavél hefur nú verið komið fyrir á þaki íþróttamiðstöðvarinnar, gengið verður frá tenginu hennar á næstunni. Um leið og hún er komin á verður settur hlekkur á heimasíðu sveitarfélagsins þar sem unnt verður að fylgjast með beinni útsendinnu, en vélinni verður beint að Keili og Fagradalsfjalli.

 

6.mars 2021

Í dag er haldinn íbúafundur í Grindavík vegna jarðhræringanna og er honum streymt. Hér er tengill á streymið

Á morgun verður svo haldinn íbúafundur á pólsku og verður honum einnig streymt

 

5. mars 2021

Embætti landlæknis hefur tekið saman ráð til varnar heilsutjóni og sett á heimasíðu sína.

Hér má skoða það

 

5. mars 2021

Rýmingaráætlun.

Gefin hafa verið út drög að rýmingaráætlun fyrir Sveitarfélagið Voga. Áætlunin er enn í vinnslu og eru þessi drög einungis hugsuð til að bregðast við þeim aðstæðum sem upp eru komin. 

Söfnunarmiðstöð innan sveitarfélagsins er í Íþróttamiðstöðinni og er hún hugsuð fyrir fólk sem þarf aðstoð við að komast af svæðinu ef til rýmingar kemur. Vakin er athygli á að á áætlunina vantar enn sem komið er götukort en það er í vinnslu. 

Verið er að vinna rýmingaráætlanir fyrir stofnanir sveitarfélagsins og er sú vinna langt komin.

Áætlunina má sjá hér

 

5.mars 2021

Enn eru jarðhræringar á Reykjanesi, þótt svo „óróapúlsinn“ sem gerði vart við sig s.l. miðvikudag sé nú yfirstaðinn, a.m.k. í bili. Þegar þetta er ritað skömmu fyrir hádegi föstudaginn 5. mars hafa samkvæmt vef Veðurstofunnar mælst 150 skjálftar frá miðnætti. Skjálftavirknin hefur nú færst frá Keili í átt að Fagradalsfjalli, norðan Grindavíkur. Sem stendur verða því nágrannar okkar í Grindavík meira varir við skjálftana en við hér norðan megin á skaganum.

Á daglegum upplýsingafundi Almannavarna í morgun komu fram margvíslegar og gagnlegar upplýsingar um þróun mála. Þrátt fyrir að óróapúlsinn sé nú yfirstaðinn í bili, er enn mikið um skjálftavirkni og því enn raunveruleg hætta á að kvikan geti leitað upp á yfirborðið. Fram kom einnig að verið er að bæta við GPS stöðvum á svæðinu, búið er að setja upp 7 nýja mæla og 4 til viðbótar verða settir upp nú um helgina. Eftir að þessir mælar eru allir komnir í virkni geta jarðvísindamenn fylgst enn betur með þróun mála en áður, bæði með aðstoð þessara mæla sem og með því að vinna úr gervihnattamyndum sem berast reglulega. Með þessu móti verður unnt að segja til um með meiri nákvæmni hvar kvikan er að safnast fyrir og þar með hvar líklegast er að hún komi upp á yfirborðið. Miðað við núverandi spár gerir hraunflæðiskortið ráð fyrir að útbreiðslusvæðið verði tiltölulega takmarkað, og mun að óbreyttu hvorki ógna byggð né innviðum, þ.e. raflínum og samgöngumannvirkjum.

Vísindamenn Veðurstofunnar fylgjast áfram grannt með stöðu mála og vakta það allan sólarhringinn. Almannavarnir funda daglega með öllum aðilum sem hlut eiga að máli, þ.m.t. fulltrúum sveitarfélaganna. Þeir fundir eru einnig um helgar þar til annað verður ákveðið.

Við munum áfram miðla upplýsingum hér á þessum vettvangi eftir því sem tilefni er til. Við hvetjum íbúa til að fylgjast vel með fjölmiðlum, og komi til hættuástands er mikilvægt að fylgja þeim leiðbeiningum sem fram koma hjá viðbragðsaðilum, þ.e. lögreglu og almannavörnum.

 

4. mars 2021

Heldur betri eru þær fréttirnar í dag en í gær. Við höfum samt sem áður enn varann á okkur því hlutirnir geta breyst hratt.

https://www.mbl.is/frettir/innlent/2021/03/04/ummerki_um_oroapulsinn_litt_sjaanleg/

 

 

Getum við bætt efni síðunnar?