Fræðslunefnd Sveitarfélagsins Voga
Mættir: Áshildur Linnet, Kjartan Hilmisson, Bergur Álfþórsson, Snæbjörn Reynisson,
Salvör Jóhannesdóttir, Oktavía Ragnarsdóttir, Dagmar Eiríksdóttir.
Helga Friðfinnsdóttir boðaði forföll og varamaður hennar einnig
Fundur settur kl. 18:10
1. Heilsuleikskólinn
Formaður gaf leikskólastjóra orðið til að kynna heilsuleikskólann á Suðurvöllum.
Salvör kynnti grundvallahugmyndir heilsuleikskólans og framkvæmd verkefnisins
á Suðurvöllum. Hafa starfsmenn m.a. fengið fræðslu frá Unni Stefánsdóttur einum
af stofnendum heilsuleikskólans. Nú er unnið að því að aðlaga stefnuna að starfi
Suðurvalla. Salvör telur að sú vinna sem nú fer fram á leikskólanum miði að því
að gera starfið faglegra.
Dagmar sagði frá jákvæðri reynslu sinni sem foreldris af þessari nýju stefnu.
Ræddi hún einnig um að mikilvægt væri að halda því skapandi andrúmslofti sem
ríkir á Suðurvöllum yfir í fyrstu bekki grunnskólans. Salvör taldi þó að nú væri
vilji til að brúa bilið þarna á milli með aukinni samvinnu skólanna í hreppnum.
Formaður spurði um hvenær stefnan yrði að fullu komin í framkvæmd og svaraði
Salvör því að það yrði um áramót og að leikskólinn vonaðist þá eftir að fá
viðurkenningu sem heilsuleikskóli frá Lýðheilsustofnun.
2. Námsárangur í Stóru-Vogaskóla
Snæbjörn fór yfir árangur nemenda í skólanum útfrá meðalgildi og framfarastuðli
útgefnum af námsmatsstofnun. Lagði hann fram skriflegt svar sitt sem hann
útskýrði.
Ólafur Tryggvi mætti til fundar kl. 18:30
Snæbjörn benti á að taka þarf tillit til þess hversu stór hluti nemenda tekur próf í
hverri grein. Rætt var um hvenær börn geta fengið undanþágu frá þátttöku í
samræmdum prófum.
Bergur spurði hvort ekki væri rétt að hafa áhyggjur af námsárangri í stærðfræði og
íslensku. Snæbjörn taldi rétt að hafa áhyggjur af námsárangri í stærðfræði og sagði
frá þeim aðgerðum sem hann hefur gripið til, til þess að snúa þessari þróun við.
Oktavía spurði um áhrif nýrra kennsluaðferða í stærðfræði sem hún taldi að ekki
væru að skila tilætluðum árangri. Snæbjörn taldi að ekki væri hægt að álykta strax
um þetta námsefni þar sem ekki allir skólar væru búnir að taka upp þetta efni og
væntanlega væri prófgerð enn þá ekki í fullkomnu samræmi við nýja námsefnið.
Formaður spurði hvort nauðsynlegt væri að grípa til frekari aðgerða til að bæta
námsárangur í skólanum. Greindi Snæbjörn frá því að nú væri í vinnslu
aðgerðaplan sem væntanlega yrði tilbúið á síðari hluta skólaársins. Aðgerðaplanið
verður lagt til umfjöllunar nefndarinnar.
Í umfjöllun um námsárangur ræddi Snæbjörn um mikilvægi þess að virkja foreldra
til að bæta árangur nemenda.
Ólafur spurði hvort farið væri í frekari greiningu á hvar börn stæðu höllum fæti í
hverri grein. Snæbjörn greindi frá því að hægt væri að skoða innan hvers fags
hvað betur má fara, þ.e.a.s. hvaða þáttum börnin eru slök í og hvaða þáttum þau
eru sterk í.
Bergur spurði með hvaða hætti nefndin gæti stutt við bakið á skólanum til að bæta
námsárangur. Snæbjörn treysti sér ekki til að svara því á þessum fundi.
Oktavía spurði hvað væri hugmyndin á bakvið skilvirkara eftirliti foreldra í svari
Snæbjörns. Umræður urðu um samkipti foreldra og kennara.
3. Bréf frá menntamálaráðuneytinu
Bréf frá Menntamálaráðuneytinu dagsett 1. nóvember 2004 varðandi samræmd
próf í 4. og 7. bekk 2004. Snæbjörn taldi að dagsetningarnar sem upp eru gefnar
standist ekki. Gert hafi verið ráð fyrir lengri samfelldri kennslu áður en til
samræmdra prófa kemur.
4. Önnur mál
a) Fundargerð hreppsnefndar
Formaður las upp þriðja lið fundargerðar 10. fundar hreppsnefndar
Vatnsleysustradarhrepps.
Snæbjörn greindi frá því að hann og Salvör hafi verið á fundi vegna samningsins.
Samningurinn rennur út um áramót verði honum ekki framlengt. Greindu
Snæbjörn og Salvör frá því að hreppurinn greiddi um 5 milljónir á ári fyrir
þjónustuna, þ.e. 8,6% af kostnaði fræðsluskrifstofunnar, sem þau telja óþarflega
hátt gjald. Þörf væri á að skilgreina notkun skólanna betur á þjónustu
skrifstofunnar.
b) Fjöldi funda fræðslunefndar
Formaður greindi frá því að tíu fundir hafi verið á fjárhagsáætlun nefndarinnar
fyrir þetta ár. Á nefndin inni einn fund á þessu ári. Nefndarmenn voru sammála
um að ekki væri þörf á fleiri fundum á þessu ári en að réttast væri að sækja um
a.m.k. tólf fundi á fjárhagsáætlun nefndarinnar fyrir 2005. Var það samþykkt.
c) Samningur við Skólamálaskrifstofu
Bergur Álfþórsson þakkar svör hreppsnefndar við fyrri lið fyrirspurnar frá
18.10.2004 og ítrekar um leið seinni lið fyrirspurnarinnar „...og hvers vegna var
fræðslunefnd ekki greint frá málinu?“
d) Verkfall grunnskólakennara
Fræðslunefnd lýsir ánægju með að nú hylli undir að skólastarf komist í eðlilegt
horf.
Fundi slitið kl. 19:50
