Sveitarfélagið Vogar hefur ákveðið að byggja upp miðbæjarkjarna í sveitarfélaginu. Um er að ræða svæði sem afmarkast af Stapavegi, Vogabraut og Iðndal, við innkeysluna í bæinn. Sú staðsetning er miðsvæðis í bænum, ekki síst með tilliti til fyrirhugaðs hverfis norðan við bæinn. Auk þess er gott aðgengi að svæðinu frá Reykjanesbraut. Því ættu að vera miklir möguleikar fólgnir í því að reka verslun og aðra þjónustu í miðbæ Voga. Aukin verslun og þjónustu ætti líka að skapa fleiri atvinnutækifæri í sveitarfélaginu.
Meginmarkmið verkefnisins er að móta heilsteypt svæði fyrir verslun, þjónustu og íbúðabyggð sem verði vettvangur fjölbreytts mannlífs í sveitarfélaginu og móti fallega umgjörð við innkomu í bæinn. Bærinn hefur farið ört vaxandi og eru íbúar nú um 1.250.

Á meðfylgjandi myndum má sjá rammaskipulagstillögu af svæðinu sem bæjarstjórn fékk arkitektastofuna Landslag til að vinna. Tillagan tekur töluvert mið af hryggnum Skyggni sem er á miðju svæðinu, en gert er ráð fyrir góðu aðgengi að honum og gönguleiðum í kring.
Gert er ráð fyrir að á svæðinu verði allt að 94 íbúðum í einbýlis- og parhúsum á einni hæð og allt að sex hæða fjölbýlishúsum.

Við horn Stapavegar og Vogabrautar verður hinn eiginlegi miðbæjarkjarni með verslun og þjónustu. Gert er ráð fyrir því að í fyrsta áfanga verði reist 1.500 til 2.000 m2 hús á tveimur til þremur hæðum. Þar fyrir framan verði torg og reiturinn hannaður þannig að við torgið njóti sólar sem mest.
Hér fyrir neðan má finna tillögur um breytingar á aðalskipulagi Sveitarfélagsins Voga 1994-2014 vegna miðbæjarsvæðis, nýtt deiliskipulag miðbæjarsvæðis, auk tengdra breytinga á deiliskipulagi við Iðndal og iðnaðarsvæði við Heiðarholt.

Vinna við verkefnið hefur tekið um tvö ár, en tillögurnar eru byggðar á rammaskipulagstillögum sem kynntar hafa verið fyrir íbúum hér á vefnum og á íbúafundi. Þær vinnutillögur má jafnframt nálgast hér að neðan. Við þær bárust nokkrar ábendingar og athugasemdir sem höfðu áhrif til breytinga á endanlegri skipulagstillögu.

Óhætt er að segja að aldrei hafi verið eins mikil vinna verið lögð í vinnslu skipulagstillögu í sveitarfélaginu.

Tillaga um breytingu á aðalskipulagi Sveitarfélagsins Voga 1994-2014
Tillaga um nýtt deiliskipulag miðbæjarsvæðis
Greinargerð með deiliskipulagi miðbæjarsvæðis
Tillaga um breytingu á deiliskipulagi við Iðndal
Tillaga um breytingu á deiliskipulagi við Heiðarholt

Hugmyndir sem unnið var með á vinnslustigi verkefnisins.
Rammaskipulagstillagan

Þrívíddarmyndir af svæðinu